Вырсарникун Ҫӗнӗ Шупашкарта ҫухалнӑ хӗрарӑма шыранӑ. Тупнӑ. Анчах, шел те, вӑл вилнӗ.
Хӗрарӑм каҫхине аппӑшӗ патне кайма тухнӑ. Анчах унта вӑл ҫитеймен. Ирхи 4 сехетре вӑл хӗрӗ патне шӑнкӑравланӑ та темӗнле вӑрманта пулнине, шӑнса хытма пуҫланине каланӑ. Кайран телефона пачах тытман.
Хӗрарӑма полицейскисем, тӑванӗсем, нимеҫӗсем шыранӑ. Пӗр предприяти хуралҫи ӑна курса юлнӑ иккен. Вӑл каласа кӑтартнипе ӑҫтарах шырамаллине ӑнланнӑ. Вӑхӑт кӑштах ҫеҫ иртнӗ – шырав чарӑннӑ. Хӗрарӑмӑн виллине тупнӑ…
Вӑраха тӑсӑлнӑ канмалли кунсенче, чӳкӗн 1-7-мӗшӗсенче, республикӑра ОРВИпе чирлекенсен йышӗ чакнӑ. Статистика кӑтартнӑ тӑрӑх, пӗр эрнере чирлесси 48,9 процент чакнӑ. Тепӗр майлӑ каласан, 3719 ҫын сахалрах ОРВИпе аптӑранӑ.
Ытларах Шупашкарта чирленӗ: 2406 ҫын. Иккӗмӗш вырӑнта Ҫӗнӗ Шупашкар – 218 ҫын. Иртнӗ эрнере республикӑра ОРВИпе чирлессин кӑтартӑвӗ 100 пин ҫын пуҫне 318,8 ҫын лекнӗ. Кӑтарту Ҫӗмӗрлере, Шупашкарта, Канашра, Вӑрмар тата Пӑрачкав районӗсенче пысӑкрах пулнӑ.
Сӑмах май, юпа уйӑхӗн 11-17-мӗшӗсенче Чӑваш Енре 10 пин ҫын ОРВИпе чирленӗ. Ку – рекорд.
Яшсемпе хӗрсенчен хӑшӗсем ҫемье ҫавӑриччен ура ҫине ҫирӗп тӑма ӗмӗтленеҫҫӗ. Малтан вӗренсе пӗтермелле, ӗҫе вырнаҫмалла, хваттерлӗ-ҫуртлӑ пулмалла, кайран ҫеҫ ҫӗрӗ тӑхӑнма юрать тесе шухӑшлакансемпе пӗрлех ҫамрӑклах мӑшӑрланакансем те пур.
Чӑваш Енре кӑҫалхи кӑлач уйӑхнчен пуҫласа юпа уйӑхӗн вӗҫӗччен 4 976 мӑшӑр ҫемье ҫавӑрнӑ. Пӗлтӗрхи асӑннӑ тапхӑртинчен ку цифра 24 процент пысӑкрах.
Пӗрлешекенсен вӑтам ҫулне илсен, арҫынсем — 24-30 ҫулта, хӗрарӑмсем — 25-30 ҫулта.
Мӑшӑрланакансем Шупашкар, Ҫӗнӗ Шупашкар тата Канаш хулинсенче йышлӑрах пулнӑ. Яллӑ районсенчен малтисен шутӗнче Шупашкар, Ҫӗрпӳ, Патӑрьел тата Сӗнтӗрвӑрри районӗсем.
Россельхознадзорӑн Чӑваш Енри управленийӗн пуҫлӑхӗ Алексей Палькин Ҫӗнӗ Шупашкарта 1,4 тонна кӑлпасси тӗп тӑвассине пӗлтернӗ. Аса илтерер: нумаях пулмасть, чӳк уйӑхӗн 9-мӗшӗнче, ҫак хулар кӑлпассире Африка мурӗн вирусӗн ДНКне тупнӑ.
Алексей Палькин пӗлтернӗ тӑрӑх, ҫак вирус ҫыншӑн хӑрушӑ мар. Анчах вӑл экономикӑшӑн хӑрушӑ, мӗншӗн тесен тӑкак кӳрет. Патшалӑх ветеринари служби пӗлтернӗ тӑрӑх, сысна ашне урӑх регионтан илсе килнӗ, унран кӑлпасси хатӗрленӗ. ЧР Элтеперӗ Олег Николаев хушнипе аш-какай комбиначӗн хӑш-пӗр объектӗнче карантин тесе палӑртнӑ.
Регион управленийӗн центрӗ тӗнче тетелӗнчи халӑх ушкӑнӗсенче ҫынсем ҫырнине тишкерсе пырать, унта халӑх мӗншӗн пӑшӑрханнине яваплисем патне ҫитерет. Юпа уйӑхӗ пирки каласан, Чӑваш Енри халӑха вакцинаци тата ҫул-йӗр ыйтӑвӗ пуринчен ытла пӑшӑрхантарнӑ.
Асӑннӑ центр пӗлтернӗ тӑрӑх, ыйтусене пӑхса тухассин вӑтам вӑхӑчӗ — 4 сехет те 12 минут.
Уйрӑмах хастар муниципалитетсен йышӗнче — Шупашкар, Канаш, Ҫӗнӗ Шупашкар, Улатӑр тата Ҫӗмӗрле. Тӑвай районӗнчен пӗр ҫыру та пулман-мӗн.
Чӑваш Енре пурӑнакансем ытларах чухне «Контактра» халӑх ушкӑнӗнче (1 104 ҫыру) тата Инстаграмра (562 ҫыру) шӑрҫаланӑ.
Юпа уйӑхӗнче вӗсем кӑшӑлвирус, вакцинаци, сывлӑх сыхлавӗн тата ҫул-йӗр юсавӗн ыйтӑвӗсене хускатнӑ.
Чӑваш Енри аш-какай тирпейлекен предприятире Африка мурӗн генетика материалне тупнӑ. Ҫавна май паян, чӳк уйӑхӗн 9-мӗшӗнче, Правительство комиссийӗн черетсӗр ларӑвӗ иртнӗ.
Ҫӗнӗ Шупашкарти предприятире кӑлпассие тӗрӗсленӗ. Лаборатори тӗпчевӗ палӑртнӑ тӑрӑх, унта Африка мурӗн генетика материалӗ пур. Ветеринари патшалӑх служби кун тӗлӗшпе тӗрӗслев ирттерет.
Ҫавӑн пекех мур сарӑлас пулсан ӑна пӗтермелли мелсене пӑхса тухаҫҫӗ.
Ҫӗнӗ Шупашкарта ҫуран ҫӳрекен ҫынсенчен пӗри машинӑран тарса ӳкме ӗлкӗрнӗ. Хӑй чӗрӗ те вӑр-вар пулни ҫеҫ ӑна инкекрен ҫӑлса хӑварнӑ.
Пӑтӑрмах чӳк уйӑхӗн 2-мӗшӗнче 16 сехет те 13 минутра пулса иртнӗ. Патшалӑхӑн ҫул-йӗр инспекцийӗнче пӗлтернӗ тӑрӑх, «Поло» водителӗ ҫул ҫине тухнӑ чухне «Ларгус Лада» автомобиле ирттерсе яман.
Икӗ машина ҫапӑннӑ хыҫҫӑн «Ларгус» ҫуран ҫӳрекен ҫын ҫине пырса кӗме тытӑннӑ. Арҫын машинӑран чупса тарма ӗлкӗрнӗ. «Ларгус» водительне вара пулӑшу кирлӗ пулса тухнӑ. Вӑл тухтӑрсем патне кайнӑ.
Ҫӗнӗ Шупашкар пуҫлӑхне хаклӑ япаласем туяннӑшан явап тыттарасшӑн. Хакӗсем нормативсенчен самай пысӑкрах пулнӑ.
Пӗлтӗр раштав уйӑхӗнче ирттернӗ тӗрӗслев палӑртнӑ тӑрӑх, Ҫӗнӗ Шупашкарти депутатсем хаклӑ япаласем туяннӑ. Тӗслӗхрен, ручка 1304 тенкӗ тӑнӑ. Нормативпа килӗшӳллӗн вара унӑн 100 тенкӗрен хаклӑрах пулмалла мар. Кунсӑр пуҫне пралуксӑр наушник, веб-камерӑсем, гарнитурсем, пероллӑ ручка тата ытти тавар туяннӑ. Пӗтӗмпе – 32 пин ытла тенкӗлӗх.
Ҫӗнӗ Шупашкарти депутатсен пухӑвӗ тӗлӗшпе представлени ҫырнӑ. Хула пуҫлӑхӗ тӗлӗшпе вара административлӑ ӗҫ пуҫарнӑ.
Чӑваш Енре ҫамрӑк хӗрарӑма шыраҫҫӗ. Вӑл ӑҫта кайнине никам та пӗлмест.
«Лиза Алерт» ҫӑлавпа шырав отрячӗ пӗлтернӗ тӑрӑх, 33 ҫулти Светлана Матвеева юпа уйӑхӗн 1-мӗшӗнче ҫухалнӑ. Вӑл Ҫӗнӗ Шупашкарта пурӑнать. Хӗрарӑм килтен кайнӑ чухне хура куртка, тӗттӗм джинс шӑлавар, шурӑ кроссовка тӑхӑннӑ пулнӑ. Хӑйӗнпе пӗрле хура сумка илнӗ.
Светлана Матвеева 160 сантиметр ҫӳллӗш, ырхан кӗлеткеллӗ. Куҫӗ хура, ҫӳҫӗ те хура. Ун пирки мӗн те пулин пӗлетӗр пулсан, тархасшӑн, тӑванӗсене пулӑшӑр, ҫак номерсемпе шӑнкӑравлӑр: 8 800 700 5452 е 112.
Ҫӗнӗ Шупашкарти улма-ҫырла сутакан лавккана уйӑхлӑха хупса хунӑ. Кун пирки Роспотребнадзор пӗлтерет.
«Фрукты-Сухофрукты» суту-илӳ павильонӗнче санитарипе эпидемиологи йӗркисене пӑснине тупнӑ. Сӑмахран, унта сивӗ тата ӑшӑ шыв пулман. Сутуҫӑ каланӑ тӑрӑх, вӑл 5 литрлӑ кӗленчесенчи шывпа усӑ курать. Анчах вӑл гигиена тӗлӗшӗнчен таса пулнине ӗнентерекен документ та ҫук. Кӗленчесене шал енчен дезинфекцилемеҫҫӗ, ҫумаҫҫӗ. Шыва канализацие тӑкаҫҫӗ, ӑна юхтарса ямашкӑн килӗшӳ туман.
Ҫавӑн пекех алӑ ҫума раковина ҫук, дезинфекци шӗвекӗ те курӑнман. Кунсӑр пуҫне павильонра арпуса ҫурмалла касса сутнӑ. Ҫапла адмӗҫ пуҫарса павильона 30 кунлӑха хупнӑ. Ӗҫе суда ярса панӑ.
+14.3 °C